ТҮРКІСТАН: ОРДАБАСЫДАҒЫ ҚАЖЫМҰҚАН МУЗЕЙІ ЖАҢА ҒИМАРАТҚА КӨШІП, ТУРИСТЕРГЕ ҚЫЗМЕТ КӨРСЕТІП ЖАТЫР

Түркістан облысы Ордабасы ауданындағы «Қажымұқан атындағы облыстық спорт музейі» «Батыс Еуропа – Батыс Қытай» халықаралық автожолы бойында орналасқан, жақында пайдалануға берілген жаңа, заманауи Қажымұқан Мұңайтпасұлы атындағы мәдени-спорт кешеніне көшіріліп, жаңаша бағытта жұмыс істей бастады. Бұл қадам музей қызметін жетілдіру мен туристік әлеуетті арттыруға зор мүмкіндік береді.

Бүгінде музей ұжымының басты мақсаты – өскелең ұрпақтың тарихи сана-сезімін қалыптастыру, ұлттық спортты, отандық тұлғалардың өнегелі өмір жолын дәріптеу және жас буынның мәдени-танымдық көкжиегін кеңейту. Осы бағытта музейде барша тұрғындар мен қонақтарға арналған танымдық экскурсиялар жүйелі түрде ұйымдастырылуда.

Жаңартылған музей экспозициясында қазақ халқының даңқты перзенті, әлемге әйгілі балуан Қажымұқан Мұңайтпасұлының өмірі мен спорттағы теңдессіз жетістіктері кеңінен қамтылған. Мұнда тарихи құжаттар, сирек кездесетін фотосуреттер мен құнды жәдігерлер келушілерге ерекше әсер сыйлайды.

Экспозицияның ең көрнекті тұстарының қатарында Қажымұқан атамыздың Ұлы Отан соғысы жылдарында майданға сыйға тартқан ұшағының макеті, 1938–1943 жылдары Отырар ауданы Ақтөбе ауылында тұрған үйінің макеті, сондай-ақ өзі тұрған киіз үйі музей төрінен лайықты орын алған. Бұл жәдігерлер келушіні өткен ғасырдың тарихи кезеңіне жетелеп, ұлт перзентінің ел үшін жасаған ерен еңбегін терең сезінуге мүмкіндік береді.

Музейде бұрын болмаған Ордабасы ауданы мен Түркістан өңірінің спорт шежіресін айшықтайтын тың экспозициялар да ұсынылған. Бұл бағыттағы жаңашылдықтар музейдің тек тарихи орын ғана емес, мәдени-танымдық білім беретін маңызды орталыққа айналуына ықпал етеді.

Қазіргі таңда музейде экскурсиялық топтар тұрақты түрде қабылдануда, ал келешекте арнайы білім беру бағдарламалары, мәдени іс-шаралар және спорттық викториналар ұйымдастыру жоспарланып отыр. Сонымен қатар, заманауи мультимедиялық құралдар арқылы келушілерге интерактивті таныстырулар мен виртуалды экскурсиялар ұсынылады.

Жаңа ғимарат музей қорын сақтау мен экспозицияны қорғау тұрғысынан да ыңғайлы әрі қауіпсіз жағдай жасайды. Бұл келушілерге жәдігерлерді жан-жақты көру, фото және бейне материалдар арқылы толық ақпарат алу мүмкіндігін береді. Сонымен қатар, музейде заманауи қауіпсіздік және өртке қарсы жүйелер орнатылған.

Ордабасыдағы музейдің жаңа ғимараты туристер үшін тартымды нысанға айналып, өңірдің туристік әлеуетін арттырады. Мәдени-спорт кешенінде келушілерге демалыс аймақтары, сувенир дүкендері және ақпараттық стендтер де ұсынылған. Бұл туристердің ыңғайлылығы мен мәдени тәжірибесін толықтырады.

Түркістан облысы әкімінің баспасөз қызметі мәлімдегендей, музейдің жаңа бағыттағы жұмысы аймаққа туристік ағынды арттырып, тарихи-мәдени мұра мен спорттық дәстүрлерді насихаттауда маңызды рөл атқарады. Музей келушілерді қазақ халқының спорттық дәстүрлері мен тарихи тұлғаларының жетістіктерімен таныстыру арқылы ұлттық сананы тәрбиелеуге ықпал етеді.