Сайрамда жаңа спорт кешені салынуда: Қарасу ауылында 600 шаршы метрлік нысан пайдалануға беріледі Сайрам ауданының Қарасу ауылында салынып жатқан жаңа спорт кешенінің құрылысы кестеге сай жүргізілуде. Жалпы ауданы 600 шаршы метрден асатын екі қабатты заманауи нысан алдағы уақытта ауыл жастары үшін дене шынықтырумен айналысуға қолайлы жағдай жасамақ. Қазіргі таңда кешеннің іргетасы, қабырғалары мен шатыры толық аяқталып, ішкі әрлеу жұмыстары басталып кеткен. Сонымен қатар, жаттығу залына қажетті спорттық құрал-жабдықтар орнатылуда. Аудан әкімі Арман Сабитов нысанның құрылыс барысымен арнайы барып танысып, анықталған кемшіліктер бойынша мердігер компанияға нақты тапсырмалар жүктеді. Әкім құрылыс сапасы мен белгіленген мерзімнің сақталуына ерекше мән берді. Жаңа спорт кешені – ауыл тұрғындары үшін бұқаралық спортты дамыту мен салауатты өмір салтын қалыптастыру бағытындағы маңызды әлеуметтік жоба болып отыр. Кілтсөздер: Сайрам ауданы, Қарасу ауылы, спорт кешені, Арман Сабитов, әлеуметтік нысан, спорт инфрақұрылымы, құрылыс жұмыстары, дене шынықтыру.