СОЗАҚТА ІШКІ КӨШЕЛЕРДЕ ҚАР ТАЗАЛАУ ШАРАЛАРЫ КҮШЕЙТІЛДІ

Қысқы кезеңде тұрғындардың қауіпсіз әрі кедергісіз қозғалуын қамтамасыз ету мақсатында аудан аумағында ішкі жолдар мен көшелерді қардан тазалау жұмыстары жоспарлы түрде жүргізілуде. Коммуналдық қызметтер елді мекендердегі негізгі және қосалқы көшелерге ерекше көңіл бөліп, күн сайын тазалау жұмыстарын ұйымдастыруда.

Атап айтқанда, әлеуметтік нысандарға, мектептер мен балабақшаларға, медициналық мекемелерге апаратын жолдар бірінші кезекте қардан аршылып, көлік қозғалысына қолайлы жағдай жасалуда. Сонымен қатар жаяу жүргіншілер жолдары да назардан тыс қалмай, тұрғындардың қауіпсіздігі үшін қажетті шаралар қабылдануда.

Көктайғақтың алдын алу мақсатында автокөлік жолдары мен тротуарларға инертті материалдар себіліп, жол қозғалысы қауіпсіздігін арттыруға бағытталған жұмыстар күшейтілді. Мамандардың айтуынша, бұл шаралар жол-көлік оқиғаларының алдын алуға және тұрғындардың күнделікті тіршілігін жеңілдетуге мүмкіндік береді.

Қар тазалау және қауіпсіздікке қатысты жұмыстар ауа райының қолайсыздығына қарамастан алдағы күндері де үздіксіз жалғасын табады. Жауапты мекемелер жағдайды тұрақты бақылауда ұстап, қажет болған жағдайда қосымша техника мен жұмыс күшін тартуға дайын.