ТҮРКІСТАНДАҒЫ ДЕНДРОСАЯБАҚТА КҮЗГІ АҒАШ ОТЫРҒЫЗУ АКЦИЯСЫ ӨТТІ

Түркістан қаласында экологиялық мәдениетті дамыту және қаланы көгалдандыру мақсатында дәстүрлі күзгі ағаш отырғызу акциясы өтті. Табиғатты қорғауға бағытталған игі шара Түркістан дендросаябағында ұйымдастырылып, оған жүздеген тұрғын мен қала басшылығы қатысты.

Акцияға Түркістан қаласының әкімі Әзімбек Пазылбекұлы, қалалық мәслихат депутаттары, зиялы қауым өкілдері, мемлекеттік қызметкерлер, ерікті жастар мен қала тұрғындары белсенді түрде атсалысты. Қатысушылар экологиялық мәдениетті арттыру мен табиғатты аялау идеясын дәріптеп, өз қолдарымен жас көшеттер отырғызды.

Қала әкімі өз сөзінде Түркістанның экологиялық тепе-теңдігін сақтау және тұрғындардың табиғатқа деген жауапкершілігін арттырудың маңыздылығын атап өтті.
«Қаламыздың көркі мен ауасының тазалығы әрбір тұрғынның табиғатқа деген көзқарасына байланысты. Әрбір егілген тал — келешек ұрпаққа қалдырған аманат. Біз осындай экологиялық бастамаларды тұрақты түрде жалғастыруымыз қажет», — деді Әзімбек Пазылбекұлы.

Акция барысында қатысушылар дендросаябақ аумағына 900 түп үйеңкі, 300 түп сафора, 200 түп ива және 100 түп туя ағаштарын екті. Бұл шара тек көріктендіру жұмыстары емес, Түркістанның экожүйесін сақтау мен жасыл белдеуді кеңейтуге бағытталған нақты қадам болды.

Экологиялық акцияға барлығы 300-ден астам адам қатысып, өз еңбектерімен қаланың «жасыл қорын» толықтырды. Қатысушылардың айтуынша, мұндай іс-шаралар қоғамда экологиялық сана қалыптастыруға және табиғатты қорғау мәдениетін арттыруға зор әсер етеді.

Қала әкімінің баспасөз қызметінің мәліметінше, биылғы күзгі маусымда Түркістан аумағында барлығы 124 250 түп ағаш отырғызылған. Соның нәтижесінде қаладағы жалпы жасыл желек саны 1 миллион 460 мың түптен асты. Бұл көрсеткіш экологиялық тұрақтылықты сақтауға бағытталған жүйелі жұмыстардың нәтижесі болып табылады.

Сонымен қатар, жыл басынан бері «Таза Қазақстан» бағдарламасы аясында 30-ға жуық сенбілік өткізілген. Бұл шаралар барысында көшелер мен саябақтар тазаланып, ағынды су арналары мен демалыс аймақтары ретке келтірілді.

Эколог мамандардың айтуынша, мұндай акциялар тек көріктендіру үшін ғана емес, ауа сапасын жақсартуға және климаттық тепе-теңдікті сақтау ісіне де үлкен үлес қосады. Түркістан өңірінің климатына бейімделген ағаш түрлерін таңдау – жасыл желектің өміршеңдігін арттырады.

Тұрғындар бұл бастаманы жылы қабылдап, өз қолымен ағаш отырғызу арқылы қаланың болашағына үлес қосқанын мақтан тұтты. Жас ұрпаққа табиғатты аялау мәдениетін үйрету – осы акцияның негізгі рухани мақсаты болып отыр.

Түркістан қаласы бүгінде экологиялық саясатты жүйелі түрде жүзеге асырып келеді. Қала аумағында жаңа саябақтар мен гүлзарлар салынып, көгалдандыру бағдарламасы тұрақты түрде жүргізілуде.