Мақтааралда жаңадан тағайындалған әкім орынбасары білім нысандарын аралады

Мақтааралда жаңадан тағайындалған әкім орынбасары білім нысандарын аралады

Мақтаарал ауданы әкімінің жаңа орынбасары Бижан Анарбеков аудандағы күрделі жөндеуден өтіп жатқан бірқатар мектептердің құрылыс барысымен танысып шықты. Сапар барысында ол атқарылып жатқан жұмыстардың сапасы мен мерзіміне, қаржының тиімді әрі мақсатты игерілуіне баса назар аударды.

Әкімдік тапсырмасына сәйкес, жаңа оқу жылы басталғанға дейін барлық білім беру мекемелері толықтай дайын болуы тиіс. Осы мақсатта аудан басшысының орынбасары жөндеу жұмыстарының тек кестеге сай орындалуын ғана емес, сонымен қатар туындайтын мәселелерді дер кезінде анықтап, оларды шұғыл шешу жолдарын да қарастыруда.

Қазіргі таңда ауданда 5 мектепте күрделі жөндеу жұмыстары жүріп жатыр. Аталған нысандарда шатыр ауыстырылып, терезелер, еден жабындары жаңартылып, жылу жүйелері қайта орнатылуда. Құрылыс алаңдарын аралау барысында Бижан Анарбеков мердігер компанияларға сапа мен мерзім талаптарының маңыздылығын тағы бір мәрте еске салды.

– Мектептердің қауіпсіздігі мен жайлылығы – басты басымдық. Оқушыларымыз заманауи әрі жайлы жағдайда білім алуға тиіс. Бұл мақсатқа бөлінген қаржы тиімді әрі орынды жұмсалуы қажет. Сондықтан барлық жұмыстар қатаң бақылауда болады, – деді ол.

Бижан Анарбеков кейбір мектептердегі жұмыстардың баяу жүріп жатқанын сынға алып, жауапты мердігерлерге нақты тапсырмалар жүктеді. Сонымен қатар, жөндеу жұмыстарының сапасын арттыру және мерзімінде аяқтау жөнінде ескертулер жасалды.

Жақын уақытта аудан әкімінің орынбасары барлық жөндеу жұмыстары жүргізіліп жатқан нысандарды тұрақты түрде бақылап отыратынын жеткізді. Оның айтуынша, білім саласы – өңірдің болашағына тікелей әсер ететін маңызды бағыт болғандықтан, бұл жұмыстарға айрықша мән берілуі тиіс.